एमाले अध्यक्ष केपी ओलीले महासचिवबाहेक सबै पदाधिकारी खारेज गरी मंसिरमा महाधिवेशन तोकेका छन् । आफ्नो पक्षको मात्रै केन्द्रीय समितिको बैठक बोलाएर ओलीले मंसिर २ देखि ६ सम्म १० औं महाधिवेशन घोषणा गर्दै महासचिवबाहेक सबै पदाधिकारी खारेज गरेका हुन् । ओलीले माधव नेपाल पक्षका नेताकाे जिम्मेवारी खाेसेका छन् । प्रदेश १ को इन्चार्जमा सुवास नेम्वाङ, प्रदेश २ को इन्चार्जमा सत्यनारायण मण्डल, गण्डकीको इन्चार्जमा पृथ्वीसुब्बा गुरुङ, लुम्बिनी इन्चार्जमा शंकर पोखरेल, कर्णालीका इन्चार्जमा मणि थापा र सुदूरपश्चिमको इन्चार्जमा लेखराज भट्टलाई जिम्मेवारी दिइएको छ । यस अघि कर्णालीमा माधव नेपाल पक्षका युवराज ज्ञवाली इन्चार्ज थिए । सुदूरपश्चिम प्रदेशको इन्चार्जमा भीम रावललाई हटाउँदै लेखराज भट्टलाई बनाइएको छ । यस अघि विदेश विभाग प्रमुख रहेका माधव नेपाललाई हटाएर राजन भट्टराईलाई नियुक्ति गरिएको छ ।