जनता समाजवादी पार्टीका नेताहरु कांग्रेस सभापति शेरबहादुर देउवासँग छलफलमा जुटेका छन् । दिउँसो संसदीय दलको बैठक सक्याएर देउवा निवास बुढानीलकण्ठमा पुगेका जसपा नेता र कांग्रेस सभापति देउवाबीच छलफल चलिरहेको कांग्रेसका प्रवक्ता विश्वप्रकाश शर्माले जानकारी दिए । कांग्रेससँग आफ्ना एजेण्डा मिले सत्ता समीकरणका लागि तयार रहेको बताउँदै आएको जसपाले अहिले पनि सोही विषयमा छलफल गरिरहेको छ । यसअघि बिहीबार जसपाका नेताले प्रधानमन्त्री तथा नेकपा एमालेका अध्यक्ष केपी ओलीसँग भेटवार्ता गरेका थिए । संसद्मा तत्कालीन एमालेका १२० सांसद मात्रै भएकाले जसपाको सहयोग लिइ सरकारलाई निरन्तरता दिने रणनीतिमा प्रधानमन्त्री ओलीले जसपासँगको छलफल अघि बढाएका हुन् । संसदमा जसपाको ३४ सिट छ । सर्वोच्च अदालतले यही फागुन ११ गते प्रतिनिधिसभा पुनःस्थापना गर्ने निर्णय गरेपछि र सर्वोच्चले नै यही फागुन २३ गते नेपाल कम्युनिस्ट पार्टी (नेकपा) को गठन अमान्य हुने फैसला गरेपछि मुलुकको राजनीतिले नयाँ मोड लिएको छ । माओवादी केन्द्र र एमालेको एकतापछि जुटेको बहुमतले प्रधानमन्त्री बनेका ओलीले माओवादीले समर्थन फिर्ता लिने तयारी गरेपछि बहुमत जुटाउने कसरत गरिराखेका छन् । यता माओवादी केन्द्र, प्रमुख प्रतिपक्षी दल कांग्रेस र जसपालेसमेत सत्ता समीकरणमा सहयात्राका लागि छलफल चलाइराखेका छन् ।