सप्तरी । सप्तरीको हनुमाननगर कङ्कालिनी नगरपालिकामा १५ वर्षीया बालिका र ४३ वर्षीय पुरुषबीच हुन लागेको अनमेल तथा बाल विवाह प्रहरीले रोकेको छ । प्रहरीले उमेर नपुगेकी बालिकाको ४३ बर्षीय पुरुषसँग विवाद गराउन संलग्न अन्यलाई पक्राउ समेत गरेको छ । स्थानीयवासीको सहयोगमा सप्तरी प्रहरीले मंगलबार त्यस्तो बालविवाह रोकेको हो । बालिकाको उमेर नपुगी विवाहका लागि छलफल भइरहेको सूचना पाएपछि पुगेको प्रहरीले चार जनालाई नियन्त्रण लिएको छ । रामपुर मल्हनिया प्रहरी चौकीको टोलीले हनुमाननगर कङ्कालिनी नगरपालिका–१४ की १५ वर्षीया बालिका, उनकी ४५ वर्षीया आमा, सोही ठाउँका ६७ वर्षीय रामेश्वर शर्मा सुतिहार र बेहुलाको रुपमा तयार पारिएका सप्तरीको तिरहुत गाउँपालिका–३ गोइठीका ४३ वर्षीय विनोद शर्मा सुतिहारलाई नियन्त्रणमा लिएको हो । स्थानीयका अनुसार १५ वर्षीया बालिका र ४३ वर्षीय पुरुषबीच विवाहका लागि रामेश्वरले छलफल चलाएका थिए । बालिकाका बुवाले दोस्रो विवाह गरी परिवार छाडेर हिँडेपछि चार सन्तानलाई पालनपोषण गर्दै आएकी बालिकाकी आमाले गरिबीका कारण अनमेल तथा बालविवाह गराउन खोजेको बयान दिएकी छिन् ।