पाँच वर्षमा पनि १४ औं महाधिवेशन नभएपछि ६ महिनाको म्याद थप गर्न र महाधिवेशन सार्ने घोषणाको लागि कांग्रेसले केन्द्रीय कार्यसमितिको बैठक बोलाएको छ । आगामी ५ फागुनमा बस्ने गरी कांग्रेसले केन्द्रीय कार्यसमितिको बैठक बोलाइएको केन्द्रीय कार्यालयका मुख्य सचिव कृष्णप्रसाद पौडेलद्वारा जारी विज्ञप्तिमा उल्लेख छ । आगामी फागुन १९ गतेबाट वर्तमान केन्द्रदेखि वडा तहसम्मकै कार्यसमितिहरुको म्याद सकिंदैछ । नियमित चार वर्षमा र थप एक वर्षको म्याद सकिन लाग्दासमेत पटकपटक घोषित १४ औं महाधिवेशन हुन सकेको छैन । यस अघि यही फागुन ७ देखि १० सम्म काठमाडौंमा १४ औं महाविधेशन गर्ने घोषणा भएको थियो । तर, महाविधेशन हुने गरी आन्तरिक समायोजनदेखि सदस्यताको विषय नै कांग्रेसले टुंग्याउन सकेको छैन । अब संविधानले दिएको ६ महिनाको अवधिमा भने कुनै हालतमा १४ औं महाधिवेशन गर्नैपर्ने दबाब कांग्रेसलाई छ ।