काठमाडौं । सुदूरपश्चिम प्रदेशका मुख्यमन्त्री त्रिलोचन भट्टले आज प्रदेशसभामा विश्वासको मत लिँदैछन् । नेकपा एमालेको ओली पक्षले विपक्षमा मतदान गर्ने निर्णय गरिरहेका बेला प्रदेश संसदीय दलले भने भट्लाई नै विश्वासको मत दिने निर्णय गरेको छ । माधव नेपाल समूहको बहुमत रहेको सुदूरपश्चिममा संसदीय दलले मुख्यमन्त्री भट्टको सरकारलाई नै साथ दिने निर्णय गरेको हो । मंगलबार विहान बसेको संसदीय दलको बैठकले मुख्यमन्त्रीको पक्षमा उभिने निर्णय गरेको सामाजिक विकासमन्त्री लालबहादुर खड्काले जानकारी दिए । बैठकमा केपी शर्मा ओली पक्षका सांसदहरुले भने मत दिन नहुने बताएका थिए । पार्टी केन्द्रको निर्देशनअनुसार विश्वासको मत नदिने बताएका छन् । तर, बहुमत सांसदहरु मत दिने पक्षमा उभिएपछि उनीहरुले फरक मत राख्न चाहेका थिए । २४ सदस्यीय संसदीय दलमा ओली पक्षका ७ जना छन् । ५२ प्रदेशसभा सदस्य रहेको सुदूरपश्चिम प्रदेशमा मुख्यमन्त्रीलाई विश्वासको मत प्राप्त गर्न २७ मत आवश्यक पर्छ । अहिले प्रदेशसभामा सबैभन्दा ठूलो दल एमालेका सभामुखबाहेक २४, माओवादीका १३, कांग्रेसका १२ र जनता समाजवादी पार्टी नेपालका दुई जना छन् ।