काठमाडौं । अदालतको आदेशअनुसार कांग्रेस सांसद टेकबहादुर गुरुङको निलम्बन फुकुवा भएको छ । संघीय संसद् सचिवालयका महासचिव पद्मप्रसाद पाण्डेयले बुधबार एक सूचना जारी गरेर सांसद गुरुङको निलम्बन फुकुवाको जानकारी दिएका हुन् ।

महासचिव पाण्डेयले सर्वोच्च अदालतको आदेशबमोजिम सूचना जारी गरिएको उल्लेख छ । भ्रष्टाचार मुद्दा सर्वोच्च अदालतमा विचाराधीन रहेको अवस्थामा सर्वोच्च अदालतका न्यायाधीशद्वय मनोजकुमार शर्मा र विनोद शर्माको संयुक्त इजलासले सांसद गुरुङलाई निलम्बन गर्ने भनी संघीय संसद् सचिवालयबाट जारी सूचना बदर गरिदिएका थिए ।
समाज कल्याण परिषद्को भृकुटीमण्डपस्थित जग्गा लिजमा लिदा भ्रष्टाचार भएको भन्दै अख्तियार दुरुपयोग अनुसन्धान आयोगले दायर गरेको मुद्दामा बिशेष अदालतले उनलाई दोषी ठहर गरेको छ । मुद्दा दायर भएको अवस्थामा उनले चुनाव जितेकाले उनी सुरुदेखि नै निलम्बनमा थिए । दोषी ठहर भएपछि निलम्बन फुकुवा हुने विवादास्पद फैसला सर्वाेच्च अदालतले गरेको हो । अब भ्रष्टाचार ठहर भएका सांसद संसदमा बस्ने भएका छन् ।