काठमाडौं । काठमाडौं जिल्ला अदालतमा न्यायाधीशकै अगाडि दुई कर्मचारीबीच कुटाकुट भएको छ । इजलासमैं न्यायाधीश प्रकाशचन्द्र अधिकारीकै अगाडि विवाद भएपछि इजलास अधिकृत गोकर्ण शर्मा र नायब सुब्बा नेत्रप्रसाद बाँस्तोलाबीच कुटाकुट भएको हो । सोमबार १४ नम्बर इजलासमा यसरी दुई कर्मचारी आपसमैं भिडेका हुन् । कुटाकुटमा इजलास अधिकृत गोकर्ण शर्मा सामान्य घाइते भएका छन् । उनकाे नाकबाट रगत बगेको हो । उनीहरुबीच मालपोत कार्यालयलाई गरिएको आदेशमा कार्यालय वा कार्यालय प्रमुख कसको नाममा आदेश गर्ने भन्ने विषयमा विवाद भएपछि कुटाकुट भएको हो । आदेशमा सही गराउन लिएर जाने क्रममा शर्माले आदेशको व्यहोरा नमिलेको भन्दै फर्काइदिए । सो व्यहोरा नमिलेको विषयमा तन्किंदै गएपछि दुवैजना कुटाकुटमा उत्रिएका हुन् । अदालतले घटनाको छानविन गरी दोषीलाई कारवाही गर्ने जनाएको छ । उनीबीच कुटाकुट भएपछि केहीबेर इजलास नै प्रभावित हुन पुगेको थियो ।