अमेरिकी अन्तरिक्ष एजेन्सी नासाले आफ्नो ‘पर्सिभरन्स रोभर’लाई सफलतापूर्वक मंगलग्रहमा अवतरण गरेको छ । पृथ्वीबाट २९३ मिलियन माइलको यात्रा पार गरेर पुगेको उक्त रोभरले मंगलग्रहको भूमध्यरेखा नजिक रहेको जेजेरो क्रेटरमा आज आठ बजेर ५५(जिएमटी) मा अवतरण गरेको हो । करिब २९३ मिलियन माइलको यात्रा तय गर्दै उक्त रोभर विगत ६ महिना अघि पृथ्वीबाट निस्किएको थियो । अवतरणबारे अमेरिकी राष्ट्रपति जो बाइडेनले ट्वीटरमार्फत सार्वजनिक गरेका छन् । बाइडेनले लेखेका छन्, ‘नासा र सबैको मिहेनतले यो एतिहासिक अवतरण सफल भएकोमा सबैमा बधाई । विज्ञान र अमेरिकी चातुर्यको शक्तिअघि केही पनि सम्भावना भन्दा बाहिर छैन भन्ने आज पनि प्रामाणित भएको छ ।’ अब अर्को दुई वर्षसम्म जेजेरोमा पहिलाको जीवनको प्रमाण खोज्न त्यहाँका स्थानीय चट्टान फोड्नमा समय खर्चिने जनाइएको छ । अर्बौ वर्ष पहिला जेजेरो एउटा विशाल ताल भएको अनुमान गरिएको छ । पानी भएको ठाउँमा जीवन पनि हुन सक्ने अनुमान वैज्ञानिकहरूले गरेका छन् ।