काठमाडौं । प्रधानमन्त्री केपी ओलीले लामो समयको प्रयास र वार्तापछिमात्र नेत्रविक्रम चन्द ‘विप्लव’ नेतृत्वको नेकपासँग सहमति जुटेको बताएका छन् । नेकपासँग भएको सहमतिमा हस्ताक्षर कार्यक्रममा बोल्दै प्रधानमन्त्री ओलीले नेकपालाई सहमतिमा ल्याउन सरकारले लामो प्रयास गरेको बताएका हुन् । नेकपासँगको सहमतिलाई उनले सुरक्षित अवतरण (सेफ ल्यान्डिङ) भनेका छन् । ‘यो फोर्स ल्यान्डिङ होइन, क्र्यास ल्यान्डिङ पनि होइन, यो सेफ ल्यान्डिङ हो,’ प्रधानमन्त्री ओलीले भने । नेकपालाई सहमतिमा ल्याउन सरकारले लामो समयदेखि गम्भीरताका साथ वार्ता गरिरहेको प्रधानमन्त्री ओलीले उल्लेख गरे । ‘नेकपासँग रातारात सहमति भएको होइन, हामीले गम्भीरताका साथ वार्ता गरिरहेका थियौं,’ उनले भने, ‘तर, हामीले नगरा बजाएर वार्ता गरेनौं ।’