नेकपा माओवादी केन्द्रका अध्यक्ष पुष्पकमल दाहाल (प्रचण्ड)ले आफू फेरिक एकपटक क्रान्तिमा जाने बताएका छन् । पार्टी केन्द्रीय कार्यालय पेरिसडाँडामा नयाँ नमुना स्वास्थ्यकर्मी संघ नेपालको राष्ट्रिय भेलालाई सम्बोधन गर्दै उनले अझै युद्ध नसकिएकाले क्रान्तिमा जान तयार भएको बताएका छन् । ‘म छोड्नेवाला छैन म एकचोटी पुनः क्रान्तिमा जानेवाला छु । लड्नेवाला नै छु,’ उनले भने, ‘एउटा ब्याटल त जितियो तर अझै केही ब्याटल जित्नै पर्ने छ । आउने दिन उज्याला हुनेछन् ।’ देशको परिस्थिति जटिल र चुनौतीपूर्ण बनेको भन्दै अहिलेसम्म प्राप्त भएका राजनीतिक उपलब्धिमाथि धावा बोल्ने काम भइरहेको बताए । ‘केपी प्रवृत्तिविरुद्ध १९ पेजको दस्तावेज लेख्दै गर्दा जनयुद्धको दस्तावेज लेखेको अनुभूति भएको थियो । भएकै छ,’ उनले भने, ‘अब पनि केपी प्रवृत्तिविरुद्ध जानी बुझेर सम्झौता गर्नु भनेको गलत हुन्छ भनेर नै प्रहार गरेको हो ।’ दाहालले अहिले शान्तिपूर्ण रुपमा युद्ध चलिरहेको बताए । उनले भने ‘युद्ध जितेका छैनौं। राजनीतिक परिवर्तनमाथि हमला भइरहेको छ ।’ उनले अब आफूले देशव्यापी जनतासँग जोडिने अभियान चलाउने तयारी गरिरहेको बताए । दाहालले भने, ‘अब म काठमाडौंमा भन्दा अभियानमा बढी बस्ने विचारमा छु । जनतासँग नै बस्ने मेरो योजना छ।’ माओवादी केन्द्रको केन्द्रीय समितिको बैठक र राष्ट्रिय कार्यकर्ता भेला बोलाउन लागिएको भन्दै उनले त्यसबाट थप रणनीति बन्ने बताए ।