काठमाडौं । प्रमुख प्रतिपक्षी नेपाली कांग्रेसले सरकारसँग स्वास्थ्य मापदण्डलाई कडाईका साथ कार्यान्वयन गर्न सरकारसँग माग गरेको छ । कांग्रेस सभापति शेरबहादुर देउवाले पत्रकार सम्मेलनको आयोजना गरी कोरोना महामारीको प्रकोप नेपालमा पनि तिव्र रुपमा फैलिरहेकाले सरकारलाई यसप्रति संवेदनशील बन्न आग्रह गरेका छन् । साथै उनले अहिलेको अवस्थामा जनताको सामाजिक र आर्थिक जीवन पनि प्रभावित बन्दै गएकोले सरकारले निम्न स्तरका जनताका लागि राहत र सहयोगका प्याकेज ल्याउन पनि माग गरेका छन् । ‘गत वर्ष पनि कोरोनाकै कारण जनताको दैनिकै निकै प्रभावित बन्यो । अहिले पनि सबै प्रकारका कामहरु ठप्प हुने अवस्थामा छन् । यसैकारण सरकारले त्यस्ता वर्गका लागि राहत तथा उद्धारका कार्यक्रमहरु ल्याउन सरकारसँग गर्दछु’, देउवाले भने । कोरोनाको फैलावट बढ्दै गएपछि सरकारले गरेको निषेधाज्ञाका कारण जनताहरु कोभिड परीक्षण नै नगरी घर गएकाले उनीहरुको सुरक्षाको जिम्मेवारी लिनुपर्ने बताए । देउवाले शहरकेन्द्रित मात्रै नभएर ग्रामीण क्षेत्रमा पनि कोभिड परीक्षण, कन्ट्राक्ट ट्रेसिङ र औषधोपचारको व्यवस्था गर्न सरकारसँग माग गरेका छन् । कोभिडकै महामारीमा पनि नेपालीहरु विदेश जाने क्रम नरोकिएकाले उनीहरुका लागि सबै अस्पतालहरुमा सहज परीक्षणको व्यवस्था मिलाउन कांग्रेसले सरकारसँग माग गरेको छ । यस्तै सीमा नाकामा बढी जोखिम भएकाले सीमा पारीबाट आउनेका लागि नाकामै प्रभावकारी परीक्षणको व्यवस्था गरी उनीहरुलाई केही समय होल्डिङ सेन्टरमा बस्ने व्यवस्था मिलाउन पनि देउवाले सरकारसँग माग गरेका छन् । यस्तै कांग्रेसले गतवर्ष फ्रन्ट लाइनमा खटिएका स्वास्थ्यकर्मीहरुले अहिलेसम्म जोखिम भत्ता नपाएको भन्दै यसवर्ष उनीहरुका लागि प्राथमिकतामा राख्नु माग गरे । सरकारले यतिबेला स्वास्थ्य सामग्री, औषधि ल्याउन पहल गर्नुपर्ने भन्दै कोरोना प्रकोपमा जनताको जिउधनको जिम्मेवारी सरकारले लिनुपर्ने बताए । खोप लगायत अत्यावश्यक सामग्री सुनिश्चित गर्न माग गर्दै देउवाले खोप उत्पादक देशहरुसँग पार्टीका तर्फबाट पनि खोप उपलब्ध गराउन माग गरेका छन् । कांग्रेस सभापतिले काेभिडकाे राेकथामबारे गराएकाे ध्यानाकर्षण वैशाख १७, २०७८प्रेस नोट देश कोभिड—१९ महामारीको दोस्रो चरणमा छ । अत्यन्त कम संख्यामा पिसीआर परिक्षण हुँदा पनि ३७ प्रतिशत संक्रमित देखिनु भनेको देशमा संक्रमितको संख्या धेरै बढी भएको सहजै निष्कर्ष निकाल्न सकिन्छ । संक्रमणबाट मृत्यु हुनेको संख्या पनि दिनानुदिन बढ्दो छ । संक्रमितहरुको उपचार गर्न देशको स्वास्थ्य संरचनाले धान्नै नसक्ने स्थिति बनेको छ । बढ्दो संक्रमण सँगै आइसियु बेड, भेन्टिलेटर र अक्सिजनको टड्कारो अभाव देखिन थालेको छ । यस्तो परिस्थिति आउनुमा सरकारको चरम लापरवाही, असंवेदनशीलता र अर्कमन्यता जिम्मेवार छ । यो सरकार न विगतका गल्तीहरुबाट सिक्छ न नेपाली कांग्रेस तथा अन्य सरोकारवालाहरुले दिएको सल्लाह र सुझावलाई आत्मसात गर्छ । अधुरा कामलाई नै पूरा भएको भन्दै उद्घाटन, भिडभाड र तडक—भडकमा मग्न ओली सरकारले संक्रमण रोक्ने कुनै ठोस काम नगरेकोले फेरि लकडाउन गर्ने स्थितिमा पुगेको छ । सरकारले काठमाडौं उपत्यका लगायतका ठाउँहरुमा १५ दिने लकडाउन लगाउने निर्णय गरे पछि कोभिड—१९ परिक्षण नगरी उपत्यका छोड्ने समय दिएर लाखौं मानिसहरु लकडाउन नभएका कम संक्रमित जिल्लाहरुमा पुगेका छन् । सरकारको यस्तो निर्णयले संक्रमण कम भएका ठाउँहरुमा समेत व्यापक संक्रमण बढ्ने खतरा बढेको छ । कोभिड—१९ को बढ्दो संक्रमणका कारण जनताले भोगिरहेको समस्याबाट पार पाउन संक्रमण रोकथाम र उपचारको समुचित प्रबन्ध मिलाई लकडाउनको समयलाई पूर्ण रुपमा सदुपयोग गरी तत्काल निम्न काम गर्न नेपाली कांग्रेस सरकारसँग जोडदार माग गर्दछ । (१) कोभिड–१९ संक्रमितहरुको उपचारका लागि अत्यावश्यक अक्सिजन र भेन्टिलेटरको यथेष्ट आपूर्ति तत्काल सुनिश्चित गरियोस् ।(२) कोभिड—१९ संक्रमितहरुलाई आवश्यक अस्पताल बेड, आइसियु वेड लगायतका स्वास्थ्य पूर्वाधार, अत्यावश्यक औषधी र अन्य आवश्यक स्वास्थ्य सामाग्रीहरुको तत्काल समुचित व्यवस्था गरियोस् ।(३) देशका सम्पूर्ण जिल्लाहरुमा कन्ट्याक ट्रेसिङ्गलाई प्रभावकारी बनाई सम्भावित संक्रमितहरुको पिसीआर परिक्षणलाई व्यापक गरियोस् ।(४) सिमा नाकाहरुमा अनिवार्य पिसिआर परिक्षण र परिक्षणको नतिजा नआउन्जेल होल्डीङ केन्द्रहरुमा राख्ने व्यवस्था गरियोस् । परिक्षणमा संक्रमित देखिएकाहरुलाई स्थानीय निकायहरुको समन्वयमा आइसोलेसन केन्द्रहरुको व्यवस्था गरी राखियोस् ।(५) स्वास्थ्यकर्मी, सफाईकर्मी र सुरक्षाकर्मीहरुलाई विमा र जोखिम भत्ता तत्काल कार्यान्वयन गरियोस् । बढ्दो संक्रमणसँगै स्वास्थ्य जनशक्तिको अभाव देखिएकाले अस्पतालहरुमा थप स्वास्थ्य जनशक्तिको व्यवस्था गरियोस् ।(६) पूर्वाग्रही ढंगले लामो समयदेखि प्राविधिक स्वास्थ्य सचिव रिक्त राख्ने सरकारको गैर जिम्मेवारीपूर्ण रवैयाको भत्र्सना गर्दै तत्काल प्राविधिक स्वास्थ्य सचिवको व्यवस्था स्ुनिश्चित गर्न फेरि माग गर्दछौं ।(७) खोप आपूर्ति लगायत अत्यावश्यक स्वास्थ्य सामाग्रीको आपूर्ति सुनिश्चित गर्न प्रभावकारी कुटनैतिक पहल गरियोस् ।(८) लकडाउनका समयमा पनि किसानका कृषि उपज तथा अन्य उपभोग्य वस्तुहरुको आपूर्ति र आवत—जावतलाई सहज गरियोस् ।(९) विदेशमा जानेहरुलाई आवश्यक पिसिआर परिक्षण गर्ने अस्पतालहरुको संख्याबढाइयोस् ।(१०) लकडाउनका कारण आर्थिक सामाजिक मारमा परेका आम नागरिक, श्रमिक र साना व्यवसायीहरुलाई आवश्यक राहत र सहयोगको कार्ययोजना ल्याइयोस् ।(११) मास्क अनिवार्य लगाउने, सावुन पानीले हात धुने, भौतिक दुरी कायम गर्ने लगायतका स्वास्थ्य सुरक्षा मापदण्डहरुलाई कडाइका साथ लागू गर्न अनुगमन संयन्त्र मजवुत गरियोस् । नेपाली कांग्रेसको प्रतिवद्धता सम्पूर्ण नेपाली दिदीबहिनी तथा दाजुभाइहरुलाई कोभिड–१९ को संक्रमणबाट आफू पनि जोगिन र अरुलाई पनि जोगाउन कोभिड–१९ स्वास्थ्य मापदण्डलाई पूर्ण पालना गर्न नेपाली कांग्रेस हार्दिक अनुरोध गर्दछ । नेपाली कांग्रेस कोभिड—१९ संक्रमणलाई रोकथाम गर्न, संक्रमितहरुलाई उपचार पहँुचमा सघाउन तथा राहत कार्य गर्न निम्न लिखित काम गर्ने प्रतिवद्धता जाहेर गर्दछ । (१) अनिवार्य मास्क लगाउने, सावुन पानीले हात धुने, भौतिक दुरी कायम गर्ने लगायतका स्वास्थ्य मापदण्ड पालना गर्न नेपाली कांग्रेसका केन्द्र देखि स्थानीय तहसम्मका सबै संरचनाहरुलाई देशभरी सचेतना अभियान संचालन गर्न क्रियाशील गराइनेछ ।(२) कोभिड—१९ बाट संक्रमित भई उपचारको पहुँचमा पुग्न समस्यामा परेकाहरुलाई हरसम्भव सहयोग गर्न पनि पार्टी संरचनाहरुलाई सक्रिय गराइनेछ ।(३) लकडाउनका कारण आर्थिक सामाजिक समस्या परेकाहरुलाई गत समयमा जस्तै सहयोग अभियान चलाउन नेपाली कांग्रेस क्रियाशील हुनेछ ।(४) यस अघि नै नेपाली कांग्रेसले विकसित मित्र राष्ट्रहरुलाई आफ्नो अग्रीम वुकिङ गरेको खोप संख्याबाट आवश्यक नभएको खोप नेपाल जस्ता देशहरुलाई उपलब्ध गराउन अनुरोध गरेको थियो । यसै बीच संयुक्त राज्य अमेरिकाले खोप सहयोग गर्ने निर्णय गरेको छ । यस निर्णयको स्वागत गर्दै अन्य विकसित मित्र राष्ट्रहरुलाई पनि खोप सहयोग पु¥याउन अनुरोध गर्दछौं । जय नेपाल ! शेरबहादुर देउवासभापति