सर्वोच्च अदालतले विघटित प्रतिनिधिसभा पुनःस्थापनाको फैसला गरेसँगै देशभर सुरक्षा सतर्कता अपनाइएको छ। सम्भावित घटनालाई मध्येनजर गरी उच्च सतर्कता अपनाइएको नेपाल प्रहरीका प्रवक्ता वसन्तबहादुर कुँवरले जानकारी दिए। भीडभाड तथा जुलुस निस्कन सक्ने क्षेत्रमा आवश्यक मात्रामा सुरक्षाकर्मी बढाइएको र शान्ति सुरक्षा कायम गर्न प्रहरीले विशेष ध्यान दिएको कुँवरले बताए। यसैगरी, नेपाली सेनाले पनि अदालतको फैसलासँगै उत्पन्न हुन सक्ने सुरक्षा चुनौती र परिस्थितिको सूक्ष्म अध्ययन र आँकलन गरिरहेको जनाएको छ। नेपाली सेनाका प्रवक्ता सन्तोषबल्लभ पौडेलले ‘‘सेनाले कुनै पनि देशमा विकसित परिस्थितिबाट उत्पन्न हुन सक्ने सुरक्षा परिस्थिति र अवस्थाबारे सूक्ष्म आँकलन गर्ने हाम्रो नियमित प्रक्रियाभित्रै पर्छ, त्यो भइरहेको’ बताए।