काठमाडौं । सुदूरपश्चिम प्रदेशका मुख्यमन्त्री त्रिलोचन भट्टले आफूले आदर्श मानेका नेता नै अहिले आफूविरुद्ध लागिपरेको गुनासो गरेका छन् । आफ्नै आदर्श नेता सरकार ढलाउन हात धोएर लागेको भन्दै ती नेताको चाहना पूरा नहुने बताएका छन् । आइतबार एक कार्यक्रमलाई सम्बोधन गर्दै मुख्यमन्त्री भट्टले संघीय मन्त्री लेखराज भट्टलाई आफूले आदर्श नेता मानेको तर अहिले उनै नेता आफ्नो सरकार ढाल्न हात धोएर पछि लागेको बताए । तर, उनको उक्त चाहना कदापि पूरा नहुने दावी गरे । ‘पुस ५ गतेदेखि नै सरकार ढाल्ने ठूलो षडयन्त्र भएको थियो,’ उनले भने, ‘तर मेरा नेताको त्यो चाहना पूरा भएको छैन, अझै पनि हुने छैन, यो सरकार नै ५ वर्ष सञ्चालन हुनेछ।’ उनले आफूले प्रदेशमा गरिरहेको काम प्रधानमन्त्री नै आए पनि गर्न नसक्ने दावी गरे । ‘हामीले प्रदेशको नेतृत्व गरेदेखि उत्कष्ट विकासका कामहरु गरिरहेका छौं । हाम्रो ठाउँमा प्रधानमन्त्री नै आए पनि यति गर्न सक्दैनन्’, उनले भने ।