च्याम्पियन्स लिग सेमिफाइनलको पहिलो लेगमा म्यानचेस्टर सिटीले पिएसजीमाथि महत्वपूर्ण जितसहित अग्रता लिएको छ । पहिलो हाफमा एक गोलले पछाडि परेको स्थितिमा पिएसजीको घरेलु मैदानमा सिटीले दोस्रो हाफमा महत्वपूर्ण दुई अवे गोल गरेको हो । खेलको पहिलो हाफको १५ औं मिनेटमा मार्किन्हसले पिएसजीका लागि गोल गरेका थिए । उनको गोलपछि पहिलो हाफमा गोल भएन । तर, खेलको ६४ औं मिनेटमा सिटीका लागि केभिन डे ब्रुएनेले बराबरी गोल फर्काए । ७१ औं मिनेटमा रियाद महरेजले पुनः गोल थप्दा सिटीले २–१ गोलको महत्वपूर्ण अग्रता बनायो । गोल खाएको ६ मिनेटलगत्तै पिएसजी १० खेलाडीमा सीमित हुन पुग्यो । गुआइले रेडकार्ड खाएपछि पिएसजी झन् दबाबमा पर्न पुग्यो । पिएसजीको मैदानमा सिटीले महत्वपूर्ण दुई गोल गरेर दबाब बढाएकाे छ । अब दोस्रो लेग आगामी मे ५ मा सिटीको मैदानमा हुनेछ ।