काठमाडौं । कोरोना भाइरसको दोस्रो लहर आक्रामक रुपमा फैलिँदै गएपछि निषेधाज्ञामा थप कडाई हुने भएको छ । शुक्रबार सिंहदरबारमा बसेको सीसीएमसीको बैठकले निषेधाज्ञा जारी गरिएका जिल्लामा थप कडाई गर्ने निर्णय गरेको हो । यस्तै यसअघि १९ जिल्लामा निषेधाज्ञा जारी गरिएकोमा अब थप पाँच जिल्लामा पनि निषेधाज्ञा जारी गरिएको छ । शुक्रबारको बैठकले निषेधाज्ञा लागू गरिएका जिल्लामा सबै सरकारी कार्यालय सञ्चालन नगरी एक चौथाइ मात्र खोल्ने निर्णय गरेको छ । सार्वजनिक निर्माणका सम्पूर्ण कार्य बन्द गर्ने, सञ्चालन हुने उद्योगले मजदुर तथा कर्मचारीलाई उद्योग परिसरभित्रै रहने गरी सञ्चालन गर्न पनि निर्देशन दिएको छ । यस्तै भारतसँगका ३५ मध्ये १३ वटा मात्रै नाका सञ्चालन गरी २२ वटा बन्द गर्ने पनि समितिले निर्णय गरेको छ ।