हिमाली जिल्ला हुम्लामा कोरोना संक्रमितको पहिलो पटक मृत्यु भएको छ । कोरोना पुष्टि भएलगत्तै सर्केगार्ड गाउँपालिका वडा नम्बर २ को रिप गाउँका स्थानीय ५७ वर्षीय पुरुषलाई श्वास प्रश्वासमा समस्या आएका कारण मृत्यु भएको हो । यतिबेला संक्रमितले समयमै उपचार र उद्धार नपाएकै कारण मृत्यु भएको खुलासा भएको छ । मृतकका आफन्तका अनुसार श्वास प्रश्वासमा समस्या आउनेवित्तिकै छोराहरूले तुरुन्तै गाउँपालिकालाई खबर गरेका थिए । तर गाउँपालिकाले बेवास्ता गर्दा उनको उपचारका लागि अस्पताल लैँजादै गर्दा उनको बाटोमै मृत्यु भयो । सर्केगार्ड गाउँपालिकाको स्वास्थ्य चौकीमा उपचार सम्भव नभएपछि उनलाई थप उपचारका लागि जिल्ला अस्पताल लैजादैँ गर्दा बाटोमै मृत्यु भएको थियो । उनको स्वास्थ्य अवस्था हेर्दा हेलिकोप्टरको सहायतामा अस्पताल लगिनुपर्ने थियो । तर, त्यसको पहुँच नभएपछि बिहीबार बिहान दुई जना छोराहरुले उनलाई घोडामा चढाएर दुल्ली कुना पुर्याएका थिए । त्यहाँबाट अगाडि बढ्दै गर्दा उनको बाटोमै मृत्यु भएको हो । कर्णाली प्रदेश सरकारले संक्रमितको उद्धारका लागि निःशुल्क हेलिकोप्टरको व्यवस्था गर्ने निर्णय गरेको थियो । तर उनको हकमा गाउँपालिका गुहार्दा पनि कुनै सहयोग हुन सकेन । रिप गाउँ सदरमुकामबाट पैदल हिडेर जान दुई दिन लाग्ने दुर्गम गाउँ हो । ु‘बुवालाई हेलिकोप्टरबाट उद्धार गरेर थप उपचार गर्न पाएको भए बचाउन सकिन्थ्यो,’ मृतकका छोरा जसबहादुर विश्वकर्माले भने, ‘तर हामी गरीब र दलित भएकै कारण उपचार र उद्धार पाउन सकेनौँ ।’ आर्थिक श्रोत कमी भएको कारण आफै हेलिकोप्टर रिजर्भ गर्न नसक्ने तर गाउँपालिका, प्रदेश सरकारको आशा गरेपनि त्यो माग सुनुवाई नभएको उनले गुनासो गरे । कोरोना संक्रमित बिरामीको उद्धार गर्न हेलिकोप्टरले साढे नौ लाख भाडा लिने गर्छन । अर्का छोरा भिम विश्वकर्मा पनि आर्थिक अभावकै कारण बाबुलाई गुुमाउनु परेको बताउँछन् । ‘सायत पैसा भएको भएपनि बचाउन सकिने रहेछ,’ उनले भने । यसअघि सर्केगाड गाउँपालिकाका स्वास्थ्य संयोजक सन्तोष धामीलाई गाउँपालिका र प्रदेश सरकारले हेलिकोप्टरबाट उद्धार गरेर जुम्ला लगेको थियो । उनले बुधबार मात्रै कोरोना जितेर बाच्न सफल भए । तर समयमै उपचार र उद्धार नभएकै कारण विभेद खेप्दै हुम्लाका पहिलो संक्रमित दलित समूदायका व्यक्तिको मृत्यु भएको छ ।