काठमाडौैं । सुप्रिम सहकारीको ठगीमा पक्राउ परेका पूर्वउपराष्ट्रपति नन्दबहादुर पुनका छोरा दिपेश पुन जेल चलान भएका छन् । जिल्ला अदालत, रुपन्देहीले चार लाख धरौटी बुझाउन भनेकोमा उनले धरौटी नबुझाएपछि जेल चलान भएका हुन् ।
पैसा नभएर धरौटी नबुझाएको उनको आफन्तले बताएका छन् । स्रोतका अनुसार छुटेलगत्तै केन्द्रीय अनुसन्धान ब्यूरो(सिआइबी)ले पक्राउ गर्ने भएपछि उनले धरौटी नबुझाएका हुन् । प्रहरीले मुद्दा चलाउँदा अभियोगपत्रमै छुटी जाने भएमा सिआइबीमा उपस्थित गराइने उल्लेख छ । उनी सुप्रिम सहकारीको सचिवका रुपमा एक अर्ब धेरै हिनामिनामा संलग्न भएको प्रहरीको दाबी थियो । जिबी राईसँग मिलेर पुनले सहकारी ठगी गरेका हुन् ।
सुन तस्करी प्रकरणमा पुनमाथि सिआइबीले अनुसन्धान गरिरहेको छ । सोही कारण उनले चार लाख धरौटी नबुझाएका हुन् । चिनियाँ समूहलाई सुन तस्करीमा सघाएको यसअघि छानविनमा देखिएको थियो ।