काठमाडौं । बस्ती शिलान्यास गर्न मोरङ पुगेका प्रधानमन्त्री केपी ओलीले ताप्लेजुङको दोभान बजारमा आगलागीबाट पीडित भएकालाई सरकारले राहत दिने बताएका छन् । दोभानमा आज आगलागी हुँदा ४० भन्दा बढी घरहरू जलेर नष्ट भएका छन् । मोरङ पुगेका प्रधानमन्त्री ओलीले आयोजित कार्यक्रममा पीडितलाई राहत उपलब्ध गराउने र पुर्ननिर्माण गराउने काममा सरकार तत्काल लागि पर्ने बताउँदै घटनाप्रति दुःख प्रकट गरे । ‘मलाई अत्यन्तै दुःख लागेको छ । हाम्रा बस्तीहरू जल्नु ज्यादै दुखद कुरा हो’, प्रधानमन्त्ती ओलीले भने, ‘हाम्रा सुरक्षाकर्मीहरू त्यहाँ पुगेर उद्वारका काम गरिसकेका छन् ।’ प्रधानमन्त्री ओलीले आजै विर्तामोडस्थित आदिवासी समुदायका लागि निर्मित ‘प्रदेश गौरव भिलेज’ र पूर्वाञ्चल क्यान्सर अस्पतालको उद्घाटन गरेका छन् ।