काठमाडौं । प्रमुख प्रतिपक्षी नेपाली कांग्रेसले प्रतिवन्धित नेत्रविक्रम चन्द ‘विप्लव’ समूहसँग वार्ता गर्न सरकारले गठन गरेको वार्ता टोलीबारे सकारात्मक धारणा व्यक्त गरेको छ । कांग्रेसले मुलुकका सबै समस्याको समाधान वार्ता र संवादबाट गर्नुपर्ने मान्यतामा दृढ रहँदै आएको उल्लेख गर्दै सरकार र ‘विप्लव’ समूहले वार्ताका लागि समिति गठन गर्नुलाई सकारात्मक रुपले लिएको जनाइएको छ । कांग्रेसका प्रवक्ता विश्वप्रकाश शर्माले आज विज्ञप्तिमार्फत सरकार र सो समूहले इमान्दारपूर्वक बहुलवादमा आधारित संघीय लोकतान्त्रिक गणतन्त्रात्मक र संसदीय शासन प्रणालीको परिधिभित्र रही समाधान खोज्ने विश्वास व्यक्त गरेका छन् ।