कोरोना भइरस (कोभिड–१९) को संक्रमणमा परेका एक तिहाइ संक्रमितलाई मनोवैज्ञानिक तथा मस्तिष्कसम्बन्धी समस्या देखिएको पाइएको छ । त्यसमा पनि कोरोनाकै कारण अस्पताल भर्ना भएका र गहन उपचार पाएकामा भने यस्तो समस्याको खतरा झनै धेरै देखिएको छ । बेलायतका वैज्ञानिकले गरेको अनुसन्धानमा यस्तो देखिएको हो । त्यहाँका वैज्ञानिकले अमेरिकाका पाँच लाख कोरोना संक्रमितमा मनोवैज्ञानिक र मस्तिष्कसम्बन्धी हुने सम्भावित जोखिमबारे अध्ययन गरेका थिए । त्यसमध्ये कोभिड–१९ भएकालाई मुड डिसअर्डर(मनोदशा बदलिने) र एन्जाइटी(चिन्ता) को समस्या अधिकांशमा देखिएको थियो । अध्ययनमा दुई समूहका व्यक्तिमाथि अनुसन्धान गरिएको थियो । एक, कोभिड–१९ को संक्रमण भएका र अर्को सामान्य रुघाखोकी भएका । अक्सफर्ड विश्वविद्यालयले गरेको उक्त अध्ययनले मस्तिष्कसम्बन्धी समस्याका लागि अन्य फ्लूभन्दा कोभिड हुनु मुख्य कारण रहेको निष्कर्ष निकालेको थियो । त्यसमा कोरोना संक्रमण हुनेहरूमा मनोवैज्ञानिक र मस्तिष्कसम्बन्धी समस्या हुने सम्भावना १६ प्रतिशतले देखिएको थियो । अन्य फ्लुबाट निको भएकाको तुलनामा कोभिडबाट निको भएकामा यस्तो समस्या हुने सम्भावना ४४ प्रतिशतले बढी भएको पाइएको छ । कोरोना संक्रमित भएका २४ प्रतिशत बिरामीमा मुड डिसअर्डर र एन्जाइटीजस्ता समस्या देखिएको थियो भने गम्भीर प्रवृत्तिका २५ प्रतिशत बिरामीमा यो समस्या देखिएको छ । त्यस्तै गहन हेरचाह पाएका कोेभिडका २८ प्रतिशत बिरामीमा यस्तो समस्या देखिएको छ । डेलिरियमको समस्या भएका ३६ प्रतिशत बिरामीमा मनोवैज्ञानिक तथा मष्तिष्कसम्बन्धी समस्या देखिएको छ । त्यस्तै कोभिड लागेका बिरामीमा दुई प्रतिशतमा स्ट्रोकको समस्या देखिएको छ । त्यसमा पनि आइसियूमा भर्ना भएकामा यो समस्या ७ प्रतिशत छ भने डेलिरियम भएकामा ९ प्रतिशत । त्यस्तैगरि सबै कोभिड बिरामीमा ०.७ प्रतिशतले डिमेन्सियाको पनि समस्या देखिएको छ ।