एमालेनिकट खेलकुद महासंघको अध्यक्षमा पौडेल
काठमाडौं । सत्तारुढ नेकपा एमालेनिकट नेपाल खेलकुद महासंघको राष्ट्रिय भेलाले अध्यक्षमा रमेश पौडेललाई चयन गरेको छ । ‘खेलकूद नागरिकको मौलिक अधिकार, समृद्धिका लागि जनस्वास्थ्य हाम्रो सरोकार’ भन्ने नारासहित आज सम्पन्न सो महासंको भेलाले अध्यक्ष पुरुषोत्तम पौडेलले संगठन विरोधी गतिविधि गरेको भन्दै उनलाई पदमुक्त गरी युवा संघ नेपालका पूर्वअध्यक्ष रमेश पौडेललाई अध्यक्ष चयन गरेको हो । भेलाले पुनः गठन गरेको ५ सय ५१ सदस्यीय केन्द्रीय कमिटीको उपाध्यक्षमा पर्शुराम बस्नेत, प्रभातविक्रम कटवाल, ध्रुव आचार्य, निरेशलाल सिंह, सुदर्शन गुरुङ, सुवास श्रेष्ठ, जीतेन्द्र दाहालसहित १२ जना र महासचिवमा मेघराज पौडेललाई चयन गरेको छ । अध्यक्षको जिम्मेवारी ग्रहण गर्दै संयोजक पौडेलले पूर्वाध्यक्ष पुरुषोत्तम पौडेल राजनीति र खेलकूदको मूल मार्गबाट विचलित भई गुटबन्दीमा सक्रिय भएकाले भेलाले कारवाही गरेको बताए । उनले महासंघलाई खेल, खेलाडी, प्रशिक्षक र खेलप्रेमीको साझा संगठन बनाइने देशव्यापी संगठन विस्तार अभियान सञ्चालन गर्ने उद्घोष गरे ।
प्रतिक्रिया