काठमाडौं । कोरोना परीक्षण गराउँदा रिपोर्ट पोजेटिभ देखिएपछि पोखराको चरक अस्पतालमा भर्ना भएका राष्ट्रिय जनमोर्चाका गण्डकी प्रदेशसभाका सांसद खिमविक्रम शाहीलाई भेट्न मुख्यमन्त्री पृथ्वीसुब्बा गुरुङ अस्पताल पुगेका छन् । तर अस्पताल प्रशासनले स्वास्थ्य मापदण्डको कारण देखाउँदै सांसद शाहीलाई भेट्न दिइएको छैन । ‘अस्पताल पुगेर उहाँ (गुरुङ) ले शीघ्र स्वास्थ्य लाभको कामना गर्नुभयो । अस्पताल प्रशासनसँग उहाँ (शाही) को स्वास्थ्यवस्थाबारे बुझ्नुभयो,’ मुख्यमन्त्री गुरुङका प्रेस संयोजक विक्रम न्यौपानेले भने, ‘अस्पताल प्रशासनले स्वास्थ्य मापदण्डका कारण भेट्न दिएन, आवश्यक रेखदेखसहित उहाँको उपचार भइरहेको बतायो ।’ बुधबार दिउँसोको प्रदेशसभा बैठकमा शाही अनुपस्थित भएपछि जनमोर्चाकै अर्की सांसद पियारी थापाले सांसद सम्पर्कविहीन भएकाले खोजी गर्न माग गर्दै प्रदेशसभा सचिवालयमा निवेदन दिएकी थिइन् । शाहीकै अनुपस्थितिका कारण सदन अनिश्चितकालका लागि स्थगित भएको छ । तर प्रदेशस्थित सरकारी प्रयोगशालामा कोरोना परीक्षण गराउँदा सांसद शाहीको रिपोर्ट नेगेटिभ आएको थियो । शाहीको कोरोना रिपोर्ट दुईथरी आएकाले उनी साँचै बिरामी नै भएर अस्पताल भर्ना भएको भन्नेमा प्रदेश सांसदहरुबीच शंका उत्पन्न भएको छ ।