NepalWatch

News Portal For Eeverything In Nepal from Nepal

२०८१ वैशाख २२ गते

फ्लोर क्रसको आशंकाले पोखरेलको राजीनामा, एमालेको एकल सरकार बनाउने तयारी

काठमाडौं । अविश्वास प्रस्तावमाथि छलफल हुने तयारी हुँदैगर्दा लुम्बिनी प्रदेशका मुख्यमन्त्री शंकर पोखरेलले आइतबार बिहानै राजीनामा दिए । विश्वासको मत लिने अपेक्षा सबैले गरे पनि छलफलअघि नै राजीनामा दिएर पोखरेलले सबैलाई आश्चर्यमा पारेका छन् । एमाले स्रोतका अनुसार कर्णालीजस्तै लुम्बिनीमा पनि एमालेभित्रैबाट फ्लोर क्रस हुने त्रासले मुख्यमन्त्रीले विश्वासको मत नलिएर राजीनामा दिएका हुन् । अब भने लुम्बिनीमा एमालेले एकल सरकार बनाउने तयारी गरिरहेका छन् । प्रदेशसभामा स्पष्ट बहुमत रहेको एमालेको सरकारमा यसअघि नेकपा माओवादी केन्द्रले समर्थन गरेको थियो । जम्मा ८७ सदस्यीय प्रदेशसभामा जसपाले चार जना सांसदलाई निष्काशन गरेपछि ८१ सदस्यीय बनेको छ । जसमा नेकपा एमालेको एक्लै ४१ सिट रहेको छ । मुख्यमन्त्री पोखरेलले पनि एकल बहुमतको सरकार बनाउने दाबी गरेका छन् । आफू संविधानको धारा १६८ को उपधारा २ अनुसार मुख्यमन्त्री बनेको र अब १६८ को १ अनुसार एकल सरकार गठन हुनुपर्ने उनको दाबी छ । मुख्यमन्त्रीका प्रेस सल्लाहकार शेरबहादुर केसीका अनुसार मुख्यमन्त्री पोखरेलले एक बहुमतको सरकार बनाउने तयारीका साथ राजीनामा दिएका हुन् । उनीविरुद्ध एमाले, कांग्रेस र जसपाले वैशाख ६ गते अविश्वास प्रस्ताव दर्ता गराएका छन् । सो प्रस्तावमा छलफलका लागि बोलाइएको विशेष अधिवेशन आजबाट सुरु हुँदै छ । तर मुख्यमन्त्री पोखरेलको राजीनामा आएपछि सत्ता समीकरणको खेल फेरिएको छ । यस्तो छ अंक गणित ८७ सदस्यीय लुम्बिनी प्रदेशसभामा माओवादी केन्द्रका दुई र जनता समाजवादी पार्टी ९जसपा०का चार जना पदमुक्त भएकाले ८१ सदस्यीय भएको छ । जसमा पोखरेलको पार्टी नेकपा एमालेका ४१ सांसद छन् । एमालेलाई बहुमतका लागि चाहिने संख्या पनि ४१ नै हो । त्यसैले एमालेले एकल बहुमतको सरकार गठनमा दाबी गरेको छ । विपक्षीहरुसँग सभामुखसहित ३९ मत छ । राष्ट्रिय जनमोर्चाका एक सांसदले पनि अविश्वासको प्रस्तावलाई समर्थन गर्दा ४० मत हुने र एमाले सांसदले फ्लोर क्रस गर्दा पोखरेल नेतृत्वको सरकार ढल्ने विश्लेषणसहित विपक्षीहरुले अविश्वास प्रस्ताव दर्ता गराएका थिए । किनकी एमालेका ४१ सांसदहरुमध्ये माधव नेपाल पक्षका दुई जना सांसदहरु मुख्यमन्त्री पोखरेलको विरोधमा खुलेर लागेका थिए । विशेष अधिवेशनमा अविश्वास प्रस्तावमाथि मतदानको क्रममा फ्लोर क्रस हुँदा सरकार ढल्ने भएकाले पोखरेलले त्यस अगाडि नै राजीनामा दिएर नयाँ सरकार गठनको प्रयास थालेको उनी निकट नेताहरु बताउँछन् ।