सत्ता साझेदार नेकपा माओवादी केन्द्रले सरकारलाई दिएको समर्थन फिर्ताको पत्र आज संसद् सचिवालयमा बुझाएको छ । मंगलबार बसेको स्थायी कमिटी बैठकले सरकारबाट समर्थन फिर्ता लिएको औपचारिक निर्णय गरेको थियो । अहिले केही बेरअघि संसद् सचिवालयमा पुगेर माओवादी केन्द्रले सरकाबाट समर्थन फिर्ता गरेको पत्र बुझाएको हो । फागुन २३ मा सर्वोच्चको फैसलापछि अलग–अलग भएपछि माओवादीले आफ्ना मन्त्रीहरुलाई सरकारबाट फिर्ता बोलाइएको थियो । तर, औपचारिक रुपमा सरकारबाट समर्थन फिर्ताको घोषणा भने गरेको थिएन । बैशाख २७ गते ओलीले विशेष अधिवेशनमार्फत विश्वासको मत लिने घोषणा गरेपछि माओवादी केन्द्रको मंगलबार बसेको स्थायी कमिटी बैठकले सरकारबाट औपचारिक रुपमा समर्थन फिर्ता लिने निर्णय गरेको हो । माओवादी केन्द्रले सर्मथन र्फिता लिएसँगै सरकार अल्पमतमा परेको छ । माओवादी केन्द्रका प्रतिनिधिसभामा ५० सदस्य छन् ।