ओखलढुङ्गा । जिल्लाका गाउँगाउँमा कोरोना सङ्क्रमित भेटिन थालेका छन् । शहरमा सङ्क्रमणको दर उच्च हुन थालेपछि राजधानी काठमाडौं र तराईका जिल्लाबाट गाउँ फर्किएकामा सङ्क्रमण देखिन थालेको हो । हालसम्म जिल्लामा कोरोना सङ्क्रमितको सङ्ख्या ९ पुगेको छ । बिहीबार जिल्लाका ७ जनाको एन्टिजेन परीक्षण गरिएकामा थप ३ जनामा कोरोना पुष्टि भएसँगै सङ्क्रमितको सङ्ख्या ९ पुगेको हो । एन्टिजेन परीक्षण गरिएकामा खिजीदेम्बा गाउँपालिकाका ४३ वर्षीय पुरुष, मोलुङ गाउँपालिका–८ की १९ वर्षीया महिला र मोलुङ हाइड्रोपवरमा कार्यरत कपिलवस्तुका २८ वर्षीय पुरुषमा कोरोना सङ्क्रमण पुष्टि भएको हो । उनीहरूमध्ये खिजीदेम्बा र मोलुङका दुई जना सहरबाट कोरोना छल्न गाउँ पुगेका व्यक्ति हुन् । सहरबाट गाउँ पुगेकाहरूमा कोरोनाको लक्षण देखिन थालेपछि गाउँमा त्रास बढेको छ । ‘गाउँमा बस्न साह्रै डरमर्दो अवस्था भयो । सहरबाट आएकाहरू जताततै हिँडडुल, खानपिन गरिरहेका छन् । गाउँ पनि अब सुरक्षित भएनऽ,’ खिजीदेम्बाका शिव घिमिरेले भने, ‘भर्खर गाउँ आएकाहरूमा कोरोनाको लक्षण देखियो । जाँच्दा कोरोना पुष्टि भयो । झन् यस्ता नवप्रवेशीका कारण गाउँमा त्रास बढ्यो ।’ कोरोनाको दोस्रो लहर सुरु भएपछि ओखलढुङ्गामा हजारौँ मानिस गाउँ फर्किएका छन् । उनीहरू कोही पनि क्वारेन्टाइनमा बसेका छैनन् । गाउँ-गाउँमा समेत कोरोनाका सङ्क्रमित भेटिन थालेपछि सङ्क्रमितका सम्पर्कमा रहेकालाई समेत स्वास्थ्य जाँच गराउनुपर्ने माग बढेको छ । तर तत्काल लक्षण देखिएका बाहेक अन्यलाई परीक्षण गर्न सक्ने अवस्था नरहेको जिल्ला स्वास्थ्य प्रमुख सुमन तिवारीले बताए । जिल्लामा सङ्क्रमित भएकामध्ये बुधबार सङ्क्रमण पुष्टि भएका सिद्धिचरण नगरपालिका–११ रमाइलोडाँडाका एक पुरुषको जिल्ला सामुदायिक अस्पतालमा उपचार भइरहेको छ । सुरुमा जटिल समस्या देखिए पनि अहिले सङ्क्रमितको स्वास्थ्यमा केही सुधार आएको जिल्ला स्वास्थ्य प्रमुख तिवारीको भनाइ छ । उनका अनुसार नयाँ सङ्क्रमितमध्ये खिजिदेम्बाका एक पुरुषलाई अक्सिजन दिनुपर्ने अवस्था भएकाले उनको जिल्ला सामुदायिक अस्पताल ल्याउने तयारी भइरहेको छ । खिजिदेम्बाका अर्का एक पुरुषको काठमाडौंमा उपचार भइरहेको र अरु सङ्क्रमितको अवस्था सामान्य रहेकाले उनीहरू होम आइसोलेसनमा छन् । जिल्लामा कोरोनाको लक्षण देखिएकालाई एन्टिजेन परीक्षण विधिबाट जाँच्ने गरिएको छ । (रासस)