काठमाडौं । केही दिनयता गृहमन्त्री एवं नेकपाका नेता रामबहादुर थापा बादल प्रचण्ड समूहमा फर्किने चर्चा भइरहेको विषयमा उनी आफैं बोलेका छन् । ओली समूहको विराटनगरमा भएको सभामा थापाले आफू प्रचड समूहमा फर्किनेभन्ने बारेमा चलाइएको हल्ला भ्रममात्रै भएको बताए । ‘बादल फर्किदैछ भन्ने भ्रम फैलाए’ बादलले भने, ‘यस्तो हल्ला फैलाउनको पछाडि उनीहरुमा आएको आतंक र भयको अभिव्यक्ति हो ।’ गोयबल्स शैलीमा आफ्नोबारेमा गलत प्रचार गरिएको उनको भनाई थियो । थापाले प्रधानमन्त्रीबाट चालिएको प्रतिनिधिसभा विघटनको कदम संवैधानिक भएको दाबी गरे । प्रधानमन्त्रीको कदमलाई उनले अग्रगामी भएको भन्दै फोहोरो खेल र अस्थिरताबाट जोगाउन निर्वाचनमा जानुपरेको बताए । अस्थिरतामा लान खोज्ने, विकास, सुशासनमा जान अस्थिरता खडा गर्न खोजेपछि निर्वाचनमा गएर स्थायित्व लान चुनाव घोषणा गरिएको उनले बताए ।