लहान । सिरहाको गोलबजार नगरपालिका–१२ बेतौनाका स्थानीयवासीले पुस्तौंदेखि भोगचलन गर्दै आएको जमिनको लालपुर्जा पाएका छन् । भोगचलनमा रहेको गाउँब्लक जमिनको नापी कार्यालयले गाउँमै पुगेर लालपुर्जा बाँडेको हो । प्रमुख जिल्ला अधिकारी प्रदीपराज कणेलले स्थानीयवासीलाई लालपुर्जा हस्तान्तरण गर्दै नापीका कर्मचारीले लामो समयको नाँपजाँचपश्चात लालपुर्जा तयार पारेको बताए । वर्षौंदेखि बस्दै आएको जमिनको धनीपुर्जा पाएपछि आफूले आफ्नो अधिकार पाएको बताउँछन्, साहिद हुसैन । ‘बस्दै आएको गाउँब्लक जग्गामा ठूलो रकम खर्च गरेर घर निर्माण गरेको छु’, उनले भने, ‘त्यो जग्गाको अहिले मालिक बन्न पाउँदा असाध्यै खुशी छुँ ।’ वडाका ३७० घरधुरीलाई जग्गाधनी प्रमाण पुर्जा प्रदान गरिने वडाध्यक्ष गणेश मुखियाले जानकारी दिए । अझै केही विवादित अवस्थाका जमिनको लागि पनि पहल भइरहेको उनले बताए ।