काठमाडौं । निर्वाचन आयोगले नेकपा (खारेज भइसकेको) एकीकरण हुनु पूर्वको नेकपा एमाले र माओवादी केन्द्रकै अस्तित्वमा फर्केका निर्णय गरेको छ । गत २३ गते सर्वोच्च अदालतले नेकपालाई बदर गरिदिएपछि सोहीबमोजिम वुधवार निर्वाचन आयोगले केपी ओली र पुष्पकमल दाहाल ‘प्रचण्ड’ नेतृत्वको शक्तिलाई पूर्ववत् अवस्थामै फर्काइदिने निर्णय गरेको हो । यसको जानकारी संघीय संसद् सचिवालय, सात वटै प्रदेश सभा सचिवालय र सबै जिल्ला निर्वाचन कार्यालयलाई दिन पनि आयोगले भनेको छ । अब दल एकीकरण गर्ने भए १५ दिनभित्र निवेदनसहित आयोगमा उपस्थित हुन पनि आयोगको निर्णयमा उल्लेख छ । ‘अब यी दुई दलले दल एकीकरण गर्ने भएमा राजनीतिक दलसम्बन्धी ऐन, २०७३ र राजनीतिक दलसम्बन्धी नियमावली, २०७४ विपरित नहुनेगरी दुवै दलले आ–आफ्नो केन्द्रीय समितिबाट दल एकीकरण गर्ने निर्णय गरी सो निर्णयसहित नयाँ दलका रुपमा एकीकरण गर्ने भएमा एकीकरण पछि बन्ने दलको नयाँ नाम र चिह्नसमेत प्रस्ताव गरी १५ दिनभित्र आयोगमा निवेदनसहित उपस्थित हुनका लागि नेपाल कम्युष्टि पाटी (एकीकृत माक्र्सवादी–लेलिनवादी) र नेपाल कम्युनिष्ट पार्टी (माओवादी केन्द्र) लाई जानकारी गराउने,’ आयोगको निर्णयमा उल्लेख छ ।