सर्वोच्च अदालतका अत्यावश्यक कामबाहेक सेवा आज बुधबारदेखि बन्द हुने भएका छन्। कोभिड-१९ को संक्रमणका कारण निषेधाज्ञा जारी हुने भएपछि अदालतले वैशाख मसान्तसम्मका लागि सेवा बन्द गरिन लागिएकाे हाे। यो अवधिमा अदालतमा बन्दीप्रत्यक्षीकरण तथा कोभिड महामारीसँग सम्बन्धित अत्यन्त जरुरी प्रकृतिका जीवन र जनस्वास्थ्यसँग सम्बन्धित रिट निवेदनहरूको दर्ता र सुनुवाईमात्र गर्ने भएको छ । यसबाहेकका अन्य कामकारवाही र सेवा भने बन्द हुनेछन् । त्यस्तै उच्च, जिल्ला, अन्य अदालत र न्यायाधीकरणहरूको हकमा स्थानीय परिस्थिति एवं जोखिमको अवस्था मूल्यांकन गरेर उपयुक्त देखिएको कामकारवाही र सेवा प्रवाहको व्यवस्था सम्बन्धित अदालत र न्यायाधीकरणले मिलाउने निर्णय पनि सर्वोच्चले गरेको छ । बैठकपछि अदालतले जारी गरेको प्रेस विज्ञप्तिमा भनिएको छ, ‘काम कारवाही तथा सेवा प्रवाह स्थगन भएका अवधिका मुद्दा, रिट तथा निवेदनमा रहेका हदम्याद, म्याद र तारेख गुज्रने छैन।’ सर्वोच्च अदालतको उक्त निर्णय हाललाई आजदेखि वैशाख मसान्तसम्म लागू हुनेछ। बाँकी थप निर्णय आवश्यकताअनुसार यही वैशाख ३१ गते बस्ने बैठकले तय गर्ने अदालतले जनाएको छ।