सुर्खेत । कोरोना भाइरस सङ्क्रमणको दोस्रो लहर सुर्खेतमा पनि तीव्र रुपमा फैलिरहेको छ । प्रदेशमा ९८१ कोरोनाका सक्रिय सङ्क्रमितमध्ये ६ सयभन्दा बढी वीरेन्द्रनगर नगरपालिकाका मात्रै छन् । सङ्क्रमणको कडी तोड्न भन्दै मङ्गलबार रातिदेखि जिल्ला प्रशासन कार्यालय सुर्खेतले निषेधाज्ञा जारी गरेको छ । अत्यावश्यक कामबाहेक नागरिकलाई घरबाहिर निस्कन रोक लगाएपनि सार्वजनिक विकास निर्माणका कामले भने यसपटक निरन्तरता पाइरहेका छन् । गत वर्ष लकडाउन र निषेधाज्ञा हुँदा निर्माण कार्य ठप्प पारिएको थियो । यसपटक भने सरकारले जनस्वास्थ्यका मापदण्ड पालना गरेर विकास निर्माणका कार्य सञ्चालन गर्न अनुमति दिएको हो । यहाँका सडक, भवन, पुललगायतका पूर्वाधार निर्माणका कामहरु धमाधम भइरहेका छन् । पूर्वाधार विकास निर्देशनालय सुर्खेतका अनुसार चालू आर्थिक वर्षभित्र वीरेन्द्रनगरका पक्की पुल, सडक कालोपत्रे, नाली निर्माण लगायतका काम सम्पन्न गर्ने लक्ष्यका साथ काम भइरहेको छ । निर्देशनालयका इन्जिनियर सूर्य शाहीले प्रदेश सरकारअन्तर्गतका सार्वजनिक निर्माणसँग सम्बन्धित कामहरु जनस्वास्थ्य मापदण्ड पालना गरेर सञ्चालन गरिएको बताए । निषेधाज्ञामा सडक कालोपत्रेको काम प्रभावकारी भइरहेको निर्माणमा संलग्न मजदूरको भनाइ छ । ‘सडकमा मानिस र गाडी नहुँदा कालोपत्रे गर्न धेरै सजिलो भएको छ,’ मालिका निर्माण सेवाका बखत शाहीले भने, ‘स्वास्थ्य सुरक्षाका सावधानी अपनाएर फिल्डमा खटिएका छौं, भौतिक दूरी, मास्क तथा नियमित सेनिटाइजरको प्रयोगमा लापरबाही गरेका छैनौं ।’ निर्माण कार्य सञ्चालन हुँदा गत वर्षझैं मजदुरहरुले रोजगारी गुमाउनुपर्ने बाध्यता हटेको छ । (रासस)