सन २०२० मा आएको बायोग्राफिकल फिल्म सोरराइ पोत्रुले समिक्षकदेखि दर्शकमाझमा निकै चर्चा पाएको थियो । प्रदर्शनमा आएको एक वर्षपछि भने उक्त फिल्मको प्रसंशा उत्तिकै गरिन्छ । निर्माण पक्षलाई व्यवसायिक सँगै आलोचनात्मक रुपमा पनि फाइदा दिलाएको सिनेमाले अर्को उपलब्धी हासिल गरेको छ । सिनेमाको रेटिङ गरिने ‘आइएमडिपी’मा यस फिल्मलाई हालसम्मकै सबैभन्दा धेरै रेटिङ गरिनेमध्येको तेस्रो स्थान हात परेको छ ।आइएमडिपीको टप १ हजारको लिष्टमा सिनेमाले ९.१ रेटिङ हासिल गरेको छ । उक्त लिष्टमा पहिलो नम्बरमा द साशंक रिडेम्सन (९.३ रेटिङ) र दोस्रो नम्बरमा अमेरिकी क्राइम सिनेमा द गडफादर (९.२ रेटिङ) रहेको छ । प्रदर्शनपछि निरन्तर चर्चामा रहेको यस सिनेमाले यसअघि विभिन्न सिनेमहोत्सवमा पनि छनोटमा परेको थियो भने सांघाइ अन्तराष्ट्रिय सिनेमहोत्सवमा पानोरामा श्रेणीमा स्क्रिनिङ भएको थियो । यो सिननेमामा एक ग्रामिण क्षेत्रको मारा नामको व्यक्तिले आफ्नै एयरलाइन्स कम्पनी खोल्ने सपनालाई देखाइएको छ । आफ्नो सपना पछ्याउँदै जाँदा बाटोमा आइपरेका अफठ्याराहरु र त्यसलाई पार गर्दै सफलता हासिल गरेको कथा सिनेमामा प्रस्तुत गरिएको छ । सिनेमालाई सुधा कोन्गरा प्रसादले निर्देशन गरेका हुन् भने सुधा कोन्गराले लेखेकी हुन् । सिनेमा जि.आर गोपिनाथको पुस्तक ‘सिम्प्लि फ्लाइ’मा आधारित रहेको छ भने सिनेमामा गोपिनाथकै जीवनलाई देखाइएको छ ।