जुम्ला । जुम्लाको तातोपानी गाउँपालिकाको वडा नम्बर ६ रावतबाडामा कोरोनासँग मिल्दोजुल्दो लक्षणबाट गाउँका अधिकाशं मानिसहरु विरामी परेका छन् । विगत एक सातादेखि गाउँमा मानिसहरु विरामी परेका हुन् । तर उनीहरुको स्वास्थ्य जाँचमा स्थानीय सरकारले कुनै पनि सहयोग नगरेको स्थानीयले गुनासो गरेका छन् । करिब पाँचदिनदेखि गाउँका मानिसहरुमा उस्तै खालका लक्षण देखिएका छन् र धेरै मानिसहरु विरामी परिसकेका छन् । करिब पाँच दिनमा ३५ जना विरामी परिसकेका छन् । यसबारे वडा कार्यालयलाई जानकारी गराएपनि परिक्षण र उपचारमा पहल नगरेको स्थानीयको गुनासो छ । विरामी परेकाहरुमध्ये १५ जना सिकिस्त छन् । अन्य १५ जना सामान्य अवस्थाका विरामी छन् । सिकिस्त विरामी पर्नेहरु ४० वर्षका देखि ७० वर्ष उमेर समूहका छन् । कोभिड १९ को दोस्रो लहरको महामारी आएपछि उक्त गाउँमा काठमाडौँ, सुर्खेत, भोजपुर लगायतका जिल्लाबाट मानिसहरु भित्रिएका थिए ।