काठमाडौं । सरकारले सुरु गरेको शिक्षित युवा स्वरोजगार कार्यक्रम अन्तर्गत शैक्षिक प्रमाणपत्र धितो राखेर ऋण लिने युवाहरुको संख्या बढेको छ । सहुलियतपूर्ण कर्जा प्रभावकारी बन्दै गएको दावी गरेको नेपाल राष्ट्र बैंकले गत फागुनसम्म एकसय ३२ जनाले शैक्षिक प्रमाणपत्र धितोमा राखेर ऋण लिएको जनाएको छ । उक्त कार्यक्रमअन्तर्गत एकसय ३२ युवाले सर्टिफिकेट धितो राखेर ६ करोड एक लाख रुपैयाँ ऋण लिएका छन् । देशमै उद्यमशिलता बढाउन र आत्मनिर्भरतर्फ केन्द्रित हुन भन्दै सुरु गरिएको सहुलियतपूर्ण कर्जा प्रभावकारी बन्दै गएको राष्ट्र बैंकको दाबी छ । राष्ट्र बैंकको नयाँ तथ्यांकअनुसार फागुन मसान्तसम्ममा ७७ हजार एक सय ९६ ऋणीले सहुलियतपूर्ण कर्जामार्फत एक खर्ब २४ अर्ब २८ करोड रुपैयाँ कर्जा लिएको राष्ट्र बैंकले जनाएको छ । यसमध्ये कृषि तथा पशुपक्षी व्यवसाय कर्जाअन्तर्गत ३८ हजार तीन सय ५५ ऋणीलाई ८८ अर्ब २९ करोड रुपैयाँ ऋण लगानी गरिएको राष्ट्र बैंकले जनाएको छ । यस्तै महिला उद्यमशील कर्जाअन्तर्गत ३६ हजार सात सय ६३ महिला उद्यमीलाई ३२ अर्ब ९५ करोड रुपैयाँ कर्जा लगानी भएको छ । सहुलियतपूर्ण कर्जाका अन्य शीर्षकअन्तर्गत दुई हजार ७८ ऋणीको तीन अर्ब पाँच करोड रुपैयाँ बाँकी रहेको राष्ट्र बैंकले जनाएको छ । सरकारले २०७५ सालदेखि सहुलियतपूर्ण कर्जाका लागि ब्याज अनुदान कार्यक्रम थालेको थियो । नयाँ कार्यविधिअनुसार सहुलियतपूर्ण ब्याजमा विभिन्न १० प्रकारका कर्जा पाइन्छ । यसरी दिइने सहुलियतपूर्ण कर्जामा बैंक तथा वित्तीय संस्थाले आफ्नो आधार दरमा दुई प्रतिशतभन्दा बढी नहुने गरी ब्याज दर कायम गर्नुपर्ने तथा ब्याज, सूचना शुल्क, बीमा प्रिमियम र कर्जा सुरक्षण शुल्कबाहेक अरू शुल्क लिन नपाउने व्यवस्था छ ।